ភ្នំពេញ៖ ក្រុមគ្រូពេទ្យបានរកឃើញទារិកាអាយុជាង ១ឆ្នាំម្នាក់នៅក្នុងខេត្តសៀមរាប មានជំងឺផ្ដាសាយបក្សីប្រភេទ A/H9 (Influenza A/H9)។

នាយកដ្ឋានប្រយុទ្ធនឹងជំងឺឆ្លង CDC បានឲ្យដឹងនៅថ្ងៃទី១១ ខែមីនា ឆ្នាំ២០២២នេះថា ក្រុមគ្រូពេទ្យបានរកឃើញករណីជំងឺផ្តាសាយបក្សី ប្រភេទ A/H9 (Influenza A/H9) លើទារិកាម្នាក់តាមរយ:ប្រព័ន្ធតាមដានជំងឺរលាកសួត របស់ក្រសួងសុខាភិបាល ដែលបានបង្ហាញលទ្ធផលបញ្ជាក់នៅថ្ងៃទី១០ ខែមីនា ដោយមន្ទីរពិសោធន៍ថ្នាក់ជាតិ ។

ករណីជំងឺផ្តាសាយបក្សីនេះកើតលើទារិកា អាយុ១ឆ្នាំ ១ខែ រស់នៅភូមិត្រពាំងរុន ឃុំឬស្សីលក ស្រុកជីក្រែង ខេត្តសៀមរាប ដោយនៅក្នុងភូមិនោះមានមាន់ងាប់ជាបន្តបន្ទាប់ចាប់តាំងពីខែកុម្ភ: ២០២២មកម្ល៉េះ។

ទារិកានោះមានរោគសញ្ញា គ្រុនក្តៅ ក្អក និងពិបាកដកដង្ហើម និងបានទទួលការព្យាបាលនៅមន្ទីរពេទ្យកុមារអង្គរ ខេត្តសៀមរាប។

បន្ទាប់ពីបានរកឃើញករណីនេះ ក្រសួងសុខាភិបាលបានបញ្ជូនមន្រ្តីនាយកដ្ឋានប្រយុទ្ធជំងឺឆ្លង សហការណ៏ជាមួយ មន្ត្រីក្រុមឆ្លើយតបបន្ទាន់ខេត្ត ចុះអង្កេតស្រាវជាវ បង្ការ និងទប់ស្កាតការរាត្បាត ព្រមទាំងអប់រំសុខភាពដល់ប្រជាជននៅមូលដ្ឋាននោះ៕